|
|
|
|
PEUMERINTAH NEUGARA ATJÈH NARIT PEUMEURINTAH ATJÈH DI PEUNGASÉNGAN KEU BANSA-GEUH BAK UROË TANDA DJAROË MOU GAM-RI HELSINKI, 15 AGUSTUS 2005 Bismillaahirrahmaanirrahiim Assalamu’alaikum wr.wb. Sjukur alhamdulillah, bandum pudjoë meuwoë keu Po-teuh Allah SWT. Seulaweuët ngon saleuëm keu djundjôngan geutanjoë Nabi Muhammad SAW, para sahabat seureuta ahli waréh droëneuhnjan. Dilikôt nibak njan, ulôn peusampoë saleuëm meusjén nibak Paduka Njang Mulia Wali Neugara Atjèh, Tengku Hasan M. di Tiro beuseurta pimpinan PNA keu bandum Bansa Atjèh njang na di dalam dan di luwa nanggroë. Bak uroë njoë geutanjoë ka keumah tapeugot saboh peurdjandjian MoU deungon pihak peumeurintah Indonesia dalam usaha peuseuleusoë konflik di Atjèh deungon tjara damè dan meumartabat. Peuë njang ka djeuët keu peuneutôh bak uroë njoë nakeuh saboh langkah nibak le lom langkah ukeuë njang akan tatjok untôk peu-aman dan peumakmu nanggroë-teuh. Kamoë banmandum, ateuëh nan pimpinan GAM di peungasingan that meuharap supaja bandum bansa Atjèh beugeuta’at dan beugeupeudjak buët lagèë njang meutuléh meunurôt asoë nibak MoU njan. Peumeurintah Keudroë-teuh atawa Self Government akan tapeudong dan tabeuntuk di Atjèh seusuai deungon peuë njang geumeuhadjat uléh bansa droëteuh, antara laén, geutanjoë bibeuëh dalam peukara politék, ekonomi, peundidékan, agama, seureuta hukôm keuadilan seutjara demokrasi. Dô’a kamoë keu bandum bansa Atjèh njang na ban sigom dônja, chususdjih njang na di Atjèh. Seumoga bansa geutanjoë beuna sabé dalam lindôngan Allah SWT dan beu-ék tapeudjak bandum asoë peurdjandjian njoë deungon djroh. Insja Allah, geutanjoë akan meurumpok di nanggroë droëteuh dalam watèë njang hana trép lé. Keuneulheuëh that, beusabé ta-ingat, geutanjoë bandum musti beusaboh haté, beusaboh pikéran dan beusaboh tèkad supaja geutanjoë bèk keumah djipeutjré-bré uléh beurangkasoëpih. Wassalamu’alaikum wr.wb. Malik Mahmud |
